Егда бо приидет праздник, во святую ту нощь мало не весь град возмянется, и в селах возбесятся, в бубны и сопели и гуденьем струнным, плесканием и плясанием; женам же и девкам и главами киваньем, и устами их неприязнен крик, вся скверные песни, и хребтом их вихляния, и ногам их скакание и топанье; ту есть мужем и отроком великое падение, мужеско, женско и девичье шептание, блудное им воззрение и женам мужатым осквернение, и девам растление... Паки же от тех же псковичей, в той же святый день Рождества великаго Ивана Предтечи, исходят обавници, мужи и жены чаровници, по лугам и по болотам, в пути же и дубравы, ищуще смертные травы и привета чревоотравленные зелиа, в пагубу человечеству и скотом, ту же и дивиа копают корения, на потворение и безумие мужем, сия вся творят с приговоры действом диаволием в день Предтечев, с приговоры сотанынскими.